(( بنت ناس )).. لا يطوفكم حداا ..

الله خلقني بنت نـاس وحمولـه،،قـدري تعّـلا بالثريـا مكـانـه
ماهمني هرجـة قفـا او مقولـه،،او عاذلٍ يحب أصـول الخيانـه
ولاهمني قرع الحكي أو طبولـه،،مادام نبض القلب صدق وأمانـه
ياللي تجاهر بالخطـا وبسهولـه،،ماخفت من ذنبٍٍ يخالـط إهانـه
ذلٍ تجيبه كـل لحظـه عجولـه،،لا ابوه لا ابو كل نفس ٍ جبانـه
يابنت ياللي ينقال عنك خجولـه،،بينك وبين الكل صـارت ميانـه
هذا حبيبك أوصديـق الطفولـه،،وهذاك ولد الجار كنتـي وزانـه
ليتك بقيتي لغز صعـبٍ حلولـه،،او ليت ليتك شي دونه حصانـه
وياهيه ياللي تفتخـر بالرجولـه،،وينك ووين المرجلـه والرزانـه
الطيّب اللـي كـل دربٍ يجولـه،،يترك وراه الطيب في كل خانـه
وطبع الرديّ يبقى ولا شيٍ يزوله،،بالعقل عاهه وان تثقّف لسانـه
واللي قريبٍ كـل ايـد ٍ تطولـه،،يرخص بعين الكل ويقّـل شانـه
وانا ترى مانيب بنـتٍ زعولـه،،ازعل على اللي ماينومس زمانه
ازعل على اللي في حياته بطوله،،راعي علومٍ افتخر فيها عشانـه
شيخٍ كريمٍ ولد نـاس وحمولـه،،مثلي تعـلاّ بالثريـا مكاااااانـه